Tulang Tagalog

Ben Cab '94 

Ngayon na lang ulit ako susulat ng tulang Tagalog

At para sa'yo pa ito

Ngayon na lang ulit ako susulat ng tulang Tagalog

Para mas maintindihan mo

Mga damdaming nasaktan 

Walang gustong umamin kung sinong may kasalanan

Nasaktan mo ako at nasaktan kita

Ako na ang magsasabing, kasalanan nating dalawa

Mga damdaming nasayang

Sa iba nalang sana nilaan

Mga damdaming binigay noon ng lubusan

Ngayo'y nawala na ng tuluyan

Mga nasayang na oras

Mga pagkakataong gusto mo nalang tumakas

Pero di'ba yun naman ang ginagawa mo?

Tumakas, iniwan ako

Mga pangakong napako

Sabi ko na nga ba, hindi iyon totoo

Sabi na sa'yo 'wag kang mangangako

Kung hindi mo naman kayang panindigan ang mga ito

Hindi tayo para sa isa't isa

'Wag na nating ipilit pa

Alam naman natin mula umpisa

Hindi talaga tayo para sa isa't isa

Tama ngang pinakawalan kita

Ikaw man ang unang kumawala,

Tandaan mong hindi naman ako ang nangaliwa

Sa totoo lang,

Gusto kong humanap ng iba

Noong mga panahong nandyan ka pa

Pero di ko ginawa

Kase mahal kita

Mahal kita, noon iyon

'Wag kang magalala, hindi na ngayon

Sabi nga sa isang awit

"Wala nang dating pagtingin, sawa na sa'yong lambing"

Wala na ang sumisigaw na damdamin para sa'yo

Hinangin na papalayo

Wala na ni isang damdaming natira 

Naglaho na na parang bula

Gusto kong malaman mo 

Masaya akong na kilala kita

Binigyan mo ako na saya

Kahit na pansamantala

Gusto ko ring malaman mo

Para kang tinik sa dibdib ko

Laking ginhawa nung nawala ka

Maluwag na akong nakakahinga

Sana itong tulang ito

Mabasa ng isang musikero

Sana siya'y matuwa

At gawin nyang kanta

Para kapag ito'y naging kanta,

Maalala mong may naiwan ka

At siya'y masaya na

Ikaw, ano na ba?

Salamat dahil sa'yo 

Nakakasulat na ulit ako ng ganito

Salamat dahil sa'yo

Binalikan ko ang mahal ko

Mahal ko ang pagsusulat

Siguradong hindi mo alam 'yon

Mahal ko ang pagsusulat

Siguradong nagugulat ka ngayon

Hindi mo kase ako kinilala

Hindi mo inalam ang mga gusto kong gawin

Inalam mo lang ang mga GUSTO mong alamin

Pero hindi mo inalam ang mga bagay na DAPAT mong alamin

Hindi mo inalam ang mga hilig kong gawin

At ang mga bagay na nagpapasaya sa'kin

'Wag kang magalala

Patapos na ang aking tula

Pasensya na kung mahaba

Tamad ka pa naman magbasa, di'ba?

Pero bago ko tapusin ang tulang ito
Isa nalang ang ihihirit ko
Hiling ko ang tunay na kaligayahan mo
Paalam na sa iyo

Ngayon nalang ulit ako sumulat ng tulang tagalog

Para tagos sa puso mo

Ngayon nalang ulit ako sumulat ng tulang tagalog

Pangako, 

Ang susunod ay hindi na para sa'yo